ദൈവത്തെ വെറുതെ വിടുക..

സമീപകാലത്ത് നമ്മുടെ നാട്ടിൽ നടന്ന ചില സംഭവങ്ങളുടെ പത്ര വാർത്തയും, അതുമായി ബന്ധപ്പെട്ട ലേഖനങ്ങൾ  കൂടി  ഗ്രഹിച്ചപ്പോൾ പല ഇടത്തു നിന്നും   തുടങ്ങി എല്ലാം
 എത്തി ചേരുന്നത് ഒരേ സ്ഥലത്ത് തന്നെ. പറഞ്ഞ് വന്നത് ദൈവത്തിനെ പറ്റിയാണ് .
നമ്മുക്ക് ഇടയിൽ ചിലരുടെ ചിന്ത ഇങ്ങനെയാണ്, അതായത്
"ജീവിതത്തിൽ നല്ലത് സംഭവിച്ചാൽ അത് നമ്മുടെ സ്വയം പ്രയത്നം കൊണ്ട് നേടി എന്നും, മറിച്ച് സംഭവിച്ചാൽ അത് ദൈവം നമുക്ക് തന്ന വിധി എന്നും.

 ദൈവത്തെ , അതുമല്ലെങ്കിൽ വിധിയെ പഴിച്ചു സ്വയം ആശ്വസിക്കുന്ന സ്വഭാവം മനുഷ്യന്റെ കൂടെപ്പിറപ്പാണ് .
"ഈ ലോകത്തിലെ എല്ലാ കുഴപ്പങ്ങൾക്കും കാരണം ദൈവം ആണെന്നാണ് " ജിദു കൃഷ്ണമൂർത്തി എഴുതിയത് .

 നേരത്തെ സൂചിപ്പിച്ചതു പോലെ എന്തു സംഭവിച്ചാലും വിധിയെന്നു പറഞ്ഞു രക്ഷപ്പെടുന്ന ഈ ഒളിച്ചോട്ടം നമ്മളിലുണ്ടാവരുത് . ഇവിടെ എല്ലാ കുഴപ്പങ്ങൾക്കും കാരണം നമ്മൾ തന്നെയാണ് . അത് സ്വയം അംഗീകരിക്കാൻ മടിയാണ് . മദ്യപിച്ചു വാഹനമോടിച്ച് അപകടത്തിൽപ്പെട്ട് മരിച്ചാലും ദൈവം വിളിച്ചുകൊണ്ടുപോയി എന്നു പറയും . കുടിച്ചു വാഹനമോടിച്ചു എന്നതല്ല കുറ്റം . ദൈവത്തിന്റെ പേരിൽ മനുഷ്യൻ കാണിക്കുന്ന കൊള്ളരുതായ്മകൾക്ക് ഉത്തരവാദി മനുഷ്യൻ തന്നെയാണ് . എവിടെയോ മറഞ്ഞിരിക്കുന്ന ദൈവത്തിന്റെ തലയിൽ ഇതൊക്കെ  കെട്ടിവച്ച് നല്ലവനാകാൻ ശ്രമിക്കുന്ന ഈ മനുഷ്യനെ നന്നാക്കാൻ അവൻ തന്നെ വിചാരിച്ചാലേ നടക്കൂ . ദൈവത്തിന്റേയും മതത്തിന്റേയും പേരിൽ മനുഷ്യൻ കാണിക്കുന്ന വൃത്തികേടുകൾ കണ്ടിട്ടാണ് കൃഷ്ണമൂർത്തി അങ്ങിനെ പറഞ്ഞത് . പക്ഷേ അതിനു ദൈവം എങ്ങനെ ഉത്തരവാദിയാകും ? സ്വാർത്ഥ താല്പര്യങ്ങൾക്കുവേണ്ടി മതത്തെയും ദൈവത്തേയും ദുരുപയോഗപ്പെടുത്തുന്ന വക്ര ബുദ്ധിയായ മനുഷ്യന്റെ ചൂഷണ തന്ത്രങ്ങളിൽ നിന്നും വിട്ടു നിൽക്കാൻ നമ്മൾക്ക് കഴിയണം . മതമൗലീകവാദവും ഭീകരവാദവുമൊക്കെ വളർത്തിയിട്ട് സമുദായ മൈത്രിക്ക് ജാഥ നടത്തുന്ന ക്രിമിനലുകളിൽ നിന്നു മാറി നടക്കാൻ സ്വയം ശ്രദ്ധിക്കുക . ക്രിസ്തുവും കൃഷ്ണനും മുഹമ്മദ് - നബിയും ബുദ്ധനുമൊക്കെ പഠിപ്പിച്ചിട്ടുള്ളത് സ്നേഹത്തോടെ സന്തോഷത്തോടെ എല്ലാ മനുഷ്യരും ഒരു കുടുംബത്തെപ്പോലെ ജീവിക്കുവാനാണ് .

 നല്ല സമരിയാക്കാരൻ എന്ന കഥയിലൂടെ ക്രിസ്തു ഇതു വ്യക്തമായും സൂചിപ്പിച്ചിട്ടുണ്ട് . ജൂത വംശത്തിൽ അന്നുണ്ടായിരുന്ന വിഭാഗീയ ചിന്തയും അമിതമായ വംശീയ ബോധവും ഇല്ലാതാക്കാനാണ് ക്രിസ്തു ഈ കഥ പറഞ്ഞത് . മുറിവേറ്റു വഴിയിൽ വീണു കിടന്ന സഹജീവിയെ രക്ഷപ്പെടുത്താൻ സ്വവംശത്തിൽപെട്ട ഒരുത്തനും തയ്യാറായില്ല . വന്നവരൊക്കെ കാണാത്തതുപോലെ കടന്നു പോയി . അവസാനം അന്യജാതിയിൽപ്പെട്ട ഒരു സമരിയാക്കാരൻ വരേണ്ടി വന്നു ആ ജൂതനെ രക്ഷിക്കുവാൻ . ആവശ്യത്തിന് ഉപകരിക്കുക അന്യജാതിക്കാരനുമാകാം എന്ന സന്ദേശമാണ് ക്രിസ്തു ഈ കഥയിലൂടെ നൽകിയത് . വിഭാഗീയ ചിന്തപുലർത്തുന്ന അന്യമതസ്ഥനെ സ്നേഹം കൊണ്ട് മാറ്റിയെടുക്കുവാൻ കഴിയണം . അതുകൊണ്ട് ദൈവത്തെ വെറുതെ വിടുക . മനുഷ്യൻ ചെയ്യുന്നതിന്റെ ഫലമാണ് അവൻ തന്നെ അനുഭവിക്കുക . പരസ്പരം വിദ്വേഷവും വർഗ്ഗീയ ചിന്തകളുമൊക്കെ അവന്റെ തന്നെ വേലയാണ് . 

- സ്വന്തം വ്യക്തിജീവിതത്തിലുണ്ടാകുന്ന ദുരന്തങ്ങൾക്കു ഒരു പരിധി വരെ അവൻ തന്നെയാണ് ഉത്തരവാദി . കുറച്ചു പേർ ചെയ്യുന്ന ഒരു തെറ്റിന്റെ ഫലം ചിലപ്പോൾ ഒരു സമൂഹവും രാഷ്ട്രവും തന്നെ അനുഭവിക്കേണ്ടിവരും .  ലോകമഹായുദ്ധങ്ങൾ അതു തെളിയിച്ചിട്ടുള്ളതല്ലെ . ഇങ്ങിനെ മറ്റു ദുഷ്ടശക്തികളിൽ നിന്നു വമിക്കുന്ന വെറുപ്പും വിദ്വേഷവും നിങ്ങളെ ബാധിക്കാതിരിക്കാൻ പ്രത്യേകം ശ്രദ്ധിക്കണം . വിദ്വേഷവും പ്രതികാരവും , സമാധാനവും സന്തോഷവും ഇല്ലാതാക്കും . -
 ദൈവത്തേയും വിധിയേയും പഴിക്കുന്നതിനു പകരം കാരണങ്ങൾ കണ്ടെത്തി പരിഹരിക്കുകയാണു ചിന്താശക്തിയുള്ള മനുഷ്യൻ ചെയ്യേണ്ടത് . പിന്നെ ഞാൻ നേരത്തെ സൂചിപ്പിച്ചതുപോലെയുള്ള സ്വയംഭരണ പ്രതിഭാസങ്ങൾ എന്ന വിധിയെ സ്വീകരിക്കുകയല്ലാതെ നിവൃത്തിയില്ല .

ഇനി ചിന്തിക്കേണ്ടത് നിങ്ങള് ഓരോരുത്തരും മാണ്.
ചിന്തിക്കൂ,....

വിനൂട്ടി കരുവാറ്റ